INTRODUCTION

THU MAKAI

Hiche lekhabu hi Rav. Eliyahu Avikhail in asiem ahin,
Pu. Gamliel Gangte in eipao a aledoh ahi.
Pu. Gamliel Gangte lhagao phatchuomna ding hita hen!

Hiche lekhabu neucha hi "Gerei Tzedek" tahsan jieh’a Juda houva hung "Lutthah" a Israel mi laha hung lhaa Torah hin kisaan hoa dinga kijih ahi. Judaism thudawla hettna nei nailou mite'n Juda hinkhuo le chawndaan-khandaau amu theina diu kiti ahi. Chule Juda mi vahmangthah, apu-apa chawnna a hung kinungle tea dingin jong phachuom inte.

Mihiem khat hinkhuoa chiena lam lhuongpi jousie tongkhaa "Code of Jewish Law" (Judate khan-le-chawn Daan) tobanga kisun ahi. Lung luttah’a simte adinga angei cheh theina dingin Thupieh haw gil daan le aki piehna jieh haw jong themkhat akijihtha in ahi.

Hiche lekhabu hi simchai phaat tiengle lekhabu dang dang, Halacha thudawla kisun haw simbea khuolchil cheh angaijin ahi. Hiche a kijih thu hawhin Judaism heetna bulpi ahin phuding chule Torah namkol leh Thupieh haw kisaan nopna lungthim apieh ding ahi. Hitobang thudawl lam tohkitoh a kisun lekha ana tam lheh tajongle achuom beh’a hiche Daan haw huoikhawma kisun lekha alhawm nahlai jieh a hiche lekha sunpa (author) hin hiche lekhabu neucha sut ding hi khoh ahin sah ahi’in, Lutthah haw le alhuongpia Judaism heet nuom haw nasatah’a akithuopi ding kinep aumin ahi.

Guol ngai lutthah, nangma deilhenna a Judaism kotkhah a nahung lut’a Israelte lah’a nahung lhah a lsraelte Torah nahin kisaan chu nangma phatchuomna ding ahi. Na hin deilhen lampi hi lam nuom vaang ahi naisai puoi: Juda khat hidinga nakal nahin suon pat’a kuona hi hatsatna tamtah in nana lamtuo diu ahi.

Judaism in nangma ah umchan dei-um tah amu-in, chule Thupieh tamtah in nang adingin lungsietna le ngailutna ahin vetsah/ tahlang un ahi, tihi kichien taha ka seipieh nahi. Kipahna le thanopna kasei jousie hi nangma chu lungthieng seela, thildang jieh hilouva Judaism deina jieha hung lut (convert) nahi lebou guilhung thei ding bep ahiuve.

Na dei tahbah hinam ti khuolchilna dingin Houlam Thutamia Inpi (Religious Court) in ahahsatna lam jieng seija ahin lhep ding nahi. Kum khat kumlhunga Judaism inmai/huongcha a na ki vaile ding ahi. Hiche phaat sunga hi Hebrew pau le Juda hou thu haw hataha nasima khonunga na hinkhuo chiena ding lampi chu phatea hetchildeh na guot angaije. Lelam khat’a Noah chate dinga kipie thupieh sagi haw phatea nit/juina jieh’a Leisiet Hunglhung ding (Haolam Haba) a chanmun nei thei leuva gentile mipha pa jong nahi thei thouve. Hichepa joh hi na lhen joh jongle phatthei ka hin buoh thouve. Hinla, Juda khat hiding nalhen a ahilevaang Judaism le Thupieh jousie asung-apaw abawna kichieh taha heetna dinga thasie lou hiela na jaw chana naki habawl angaijin, hiche achu na lawlhin teina dingin vangbuohna le malsawmna nasatah ka hin pie'n ahi.

Hiche lekhabu hi asim nuomte adinga ka hin puohdoh toh kilhonin eina lamkai pieh le ka ojapu (late) Rabbi Zvi Yehuda Kook (phattheina chang hen) min hi seilou theiin kaki geel puoi; ama chun Israel nam vahmang haw adinga Kiloikhawmna (Association) khat phutdoh dingin eina tilkhouvin chule hiche Kilawikhawmna "Amishav" natoh haw hi Chief Rabbinate le Jewish Agency te masanga ana polutin nasataha kithuopina nei dingin ana tiemin ahi.

Hibangma chun min-phahpuoh tei ngai midang khat jong aum kitin: Israel lamkai minthang tah le chihna thepna saangtah nei, (late) Rabbi Saleiman David Sassoon ahi. Ama’n jong kum 5745 a aleisiet hinkhuo abei chan geiin thasie loule hahsatna khawhsa louin ka natoh na lam jousie ah eina kithuopiin ahi. Hiche lekhabu sutna a adieha kithuopina eina pieuva mi phabep haw chungah lunggil sunga kuona kipalma nasatah ka phuong in ahi. Amahaw chu — amasa peenin Mr.Michael Gross hiche lekhabu ei ledoh pieha, apa (late) Rabbi Abraham J .Gross mina thiensuona (dedication) ei bawl pieha, chule Gross insung mi dang haw; chule Mr. Alfonso Sabuch, hiche Association a Council member, kanatohna jousie a gien-ngaai taha ei kithuopi ah; Chule Mr. Moshe Krasniker; Professor Harold Fliéh; Mrs. Joyce Fisch; Mrs. Miriam Musai chule Mr Afyeh Sadan - amahaw hin lam chuom chuom le phat chuom chuom ah kithuopina eina pie chleh Livin. amahaw jousie chung ah kipahthu seiding ka batin ahi.

Rabbi Eliyahu Avikhail.