ISRAELTE KI LHATDOHNA
ISRAELTE KI LHATDOHNA
(Redemption of Israel).
1. Judate hinkhuo thusima phaat tamjaw chu gam paam lama suoh-le-sala ki kaimangna in ana mang tauve. Suoh le sala aki kaimang jinau ajieh 2 (ni) aumin, chehaw chu :- (i)agam sung uva nuom tah’a ache jieh uva achawnsietnau siemphat huoi hitalouho gam pama genthei hesuoh athuoh jieh uva akisiemphat theina diu, chuleh (ii) a chawnsiet jieh uva gawtna jong ahi. Tahbeh’a sei dingin ajieh dang khat jong aum nalaijin, hichu : mihiemte (namdang) ngailutna jieh jong ahi.
2. Namdang lah’a lsraelte suoh-le-sala aumnau hin namdangte lungsung ah kidang tah’in na atong jiin ahi. Israelte hinchan-khanchan haw le Torah le Thupieh dang-dang haw hi namtin lah ah ahung kithejal jiin, hichun mi tamtah Israelte lam ah ahiplut jiin ahi.
3. Isei tahsa bangun gam chuoma suoh-channa haw hin natoh khat anei chieh uve. Atil tah a Egypt gama a suoh-channau hi Torah chang thei dingle Gamtep gam lut theina dinga aki guot jou theina diu ahiin; hitia chu Pathien na tong dinga kiguong jousaa aum thein iu ahi.
4. Babylon, Persia, Greece le Rome gama a suoh-channau le tuni geija gamtin gamtanga aki thejalnau hin namdangte chawn-daan khandaan chule hou le bieh daan haw gal asatnau ah nasa tahin thahaatna apieouvin, tahsa le lungsunga akitahnau le achawnphat nau hin chidang-namdangte masang ah pachanna apie jiin ahi.
5. Judate hi aumna lam jousiee ah lhatdeh-a aum lawi nadingun taanglouvin atau jing un ahi. Akhonnia thawnlouva lhatdohna achan diu hi akinepnau bulpi khat ahi jinge, chule nopni hihen, dani hijongle Jerusalem chu asumil thei pouve. Thiemgau haw le Rabbi haw thuseina akuonin Edoma a such channau hi Messiah lalna gam, Israelte lenggamin ahin jui ding ahi tijong aheuvin ahi. Hichehi "Ni nununga lhatdohna" kiti Israelte le vannuoi leisietin ngahlel tah-a agaaldot jingu chu ahi.
6. Egypt akuona aki lhatdoh til lai uchun Israel mipi lhagau lunggeel chu ana niem lheh jienge, chule Israel Pakai, amao siempa min chu namtin vaipi lah-a suhbuoh’a aum louna dinga amahaw hi ki lhatdoh ah ahiuve; chutilou hile a siempau Pakai minthieng chu suhbuoh’a ana um ding ahi. Hibangchun Temple anina adin laija lhatdoh’a ana um hawlawi jawng chu Sabbath nitlou lawi le namdang numei jia nei lawi ana hiuve. Hijongle amahw chu lhatdoh’in ana um un, amahaw akuon in Oral Torah chu aloupina jousie toh gawmin ahung ding doh tai. Eihaw khanga Istaelte lhatdohna natoh ahung kipat til laichun amite lhagau dimnun ana niem lheh jiengin, hiche dinmun chu Ezekiel 36 naa kisei chu ahi. Hitajongle tahsa le lhagauva adinmunu chu taanglouvin khangtou intin, David chapa Messiah hung kilah chan geijin khangtou jing tante.
7 Gampaama aumnau akuona ahung pawtdoh - uva namdangte nuoisiena nuoia umlouva jaleen tah’a Israel gama ahung cheendet uchu Lhatdohna kipatna hiding ahi. Israel mipi jousie agam sunga acheenlut uva, Torah lamkaina nuoia lhagau le tahsaa hinna chamkima anuomcheen suoh kah uva chu itijongle lhatdohna chu chamkim lou ding ahi.
8. I seisa mabangun David chapa Messiah hung kilaahna chu lhatdohna chamkim kipatna hung hiding abi; ama chu amihina loupi tah le thilbawltheina thahaat saangtah anei jieha vannuoi leisiet chunga phatna le thudih-a vaihawm ding dinmuna ki khaangsaang ding ahj. Ama kama kuona leisiet mite Torah thu kihil diu, chule vannuoi leisieta hi Pathien leenggam kiphajal suoh ding ahi tai.
9. Messiah khang kichai kuon lamle mithi thawkitna chu kineppi thei hi ta'ntin, hiche thawkitna achun leisieta miphahaw hung thou uvin tin tuonsawta dinga hing/dam jing ding ahi tauve.
