GAU LE LHAGAU THIENG

THIEMGAU THU LE LHAGAU THIENG.
(Prophecy and the Holy Spirit)

1. Pathien Torah thua mihiemte chie sah theina ding le hiche Torah thu haw chu phatea achintup theina diovin leisiet ahin, lampi chuom chuom tamtah-in gau-thu (prophecy) ana kisei phuong ta'n ahi.

2. Thiemgau thudawla asaangpeen chu Torah le a thuhil haw hung kiphuon dohna hi ahi. Hichu Mose'n khonung thu ding ana seina haw chu ahi; ama chu Sinai lhaang ah Torah ana kipie in; Israel nam pumpi mitmu ahgchujongle ama'n gauthu chu athi tokah sien Pathien akuonin ana kisaan jing peh in ahi. Mose chu thiemgau lah-laha saangpeen/chungnung peen ahi.

3. Gau-thu seina saangpen chu Mose ana kipiehna jieh chu ‘Torah sung’a um thu kisun haw khel humhal a aumtheilouna ding ahi. Chujongleh ama (Moshe) thi nungsang a thiemgau koimachan Pathiena kuona Torah thah ham, thupieh thah ham ahiloule Torah ledohna thuy ham kamui ati theilouna diu ahi. Hitia hi Torah chu tuonsawt’a ding’a ahi ti hi kinamdet’a kichingtup ah ahi.

4. Thiemgau koi hijongle Mose'n apieh Torah thu haw kal/doua gau-thu sei aumle hitobang thiemgau chu thina geija gawtna chang thei ahi. Hi'nla, phaat chomkhat dinga ipi ham khat vetsahna dingin Daan khat penpen (Milim hou lou ding daan tailou) toh kituoh louva "thusuoh khat suoh ding ahi" tiin thiemgau koitobang khatin aphuong theijin, chule aphuon ding chu phal jong ana kiphal pieh jiin ahi. Chetobang thusuoh khat chu - Carmel lhaanga Elijah'n maicham ana tundoh chu ahi, Tuonsawt Daan dihpa dungjuia vaang Jerusalema Temple sung tailou mun danga kilhaina gan tha ki phallou ahi.

5. Thiemgau haw chu khonung thusuoh ding mutheina thahaat anei theina diuva aki habawl uh angaiin ahi. Hi'nla itobangin ki habawl jieng jongleu Pathien lung lam ahiloule koi thiemgao pou pouvin hitobang thil bawltheina thahaatna chu amohchan thei ahi puoi.

6. Alhaangpia Thiemgau haw natoh ding chu- a phat-phat’a jui ding’a Pathien in Asiem lampia Israelte le namdang haw jong chiesah ding tihi ahi. Ahivaangin Thiemgau haw lah-a Israelte khonung thu ding ana mu masa thei lawi jong aum thouvun ahi.

7· Gau-thu sei thei lah’a aneupen lawikhat aumin, hiche chu "Lhagau-Theng" akit tie’e. Israelte lah’a mithieng (sages) haw le namdang lah-a milien (giant) haw jong hiche thil bawltheina ana chang lawi aum un ahi. Hichea hi thil jaat chuom-chuom bawl doh le phuon doh theina dinga Pathiena kuona hilna umji ahi. Ktuvim (Thiemgau um jou nunga ana kisun lekha haw) hi hitobanga hilna a kuona ana un thei ahi.

8. Achunga kisei Thiemgau natohna haw saanga jong niem cheh khat aum kitin, hichea chun Lhagau-Thieng natohna le miching-mithiemte lunggeel phaat khattah in ahung kisutuo in, hitichun miching-mithiemte chun Torah thu heet theina le asunga thu-kiseelgu haw mudoh theina ahin nei uva kuonin Mishneh, Talmud chule adang-dang jong ahin sun thei tauvin ahi.