SAA LE BAWNGNOI
Sa leh Bawngnawi
(Meat and Milk)
Sa lah Bawngnawi huon khawm a nah khawm ding Torah in ajahnuom puo'n, hiche teni kihuon khawma kuona nawpsahna, kipahna la phatchuomna nai ding jong ajahnuom puoi. Hicha thudawl ahin lunggel tamtah aumin, chahaw lah-a khat hin sei ingkate: Mi Masa pa akisiem til chun theiga lah thingna-louna haw nehna ding thu aki pie in, sa neh ding thu vaang aki pie puoi. Hiche bang chun leisiet phaat ahung kichaia, mihiem Masa pa dinmun ahung lhun kit phaat leh hung chuti kit ding ahi. Mihiem anneh daan hi nunsietna lam hilouva nuneemna lam joh ahaw theina dingle mihiemte khonung thu ding hilna in Torah in sa neh daan la ganhing/gancha haw manchah ding daan anem/adam thei pena bawl dingin ei thuhil un ahi. Kelnou api nawitwia huonna hin "nunsiet vaal" lah "lawp vaal" na ataahlang in ahi.
(a) Sa thieng sa leh bawngnawi a alna/tuina kikaimat thei geija, huon khawm (iti huon hitaleh) phallou ahi. Hitima chun sa kan-got/gawmin leh bawngnawi awmsou chawhala malchame tobanga neh hal jong ahi thei dieh puoi. Neh keu hilouvin thildanga panna neisah jong athieng puoi.
(b) Thil dang dang hijongleh sa panna pou-pou chu sa a kisim ahiin, bawngnawi toh neh khawm thei ahi puoi. Nga vaang saa a sim ahi puoi.
(c) Sa nehjouva bawngnawi dawn dingin alhawm pena pungkah 6 (gup) ngah angaije. Ha kah-a sathem ataan leh phatea kheu thienga chujouleh kam khuo ding angaije. Sa nehjoua bawngnawi dawnna dinga pung kah khat seh-seh ngah lawi johg aum thouve.
(d) Sa huonna a ana kimangsa beel khata kihuon nehthei khat nehjouva cheese neh athieng ie. Ni khat sunga kihuon ahilevang athieng puoi
(e) Bawngnawi a kuona kisiem nehthei dang khat chule cheese (ataah hilou aneem) neh jouva khut sawp thienga chule kam khuo a chujou tieng sa neh thei ahi. Cheese chu ataah/akhal ahilevaang pung gup angah ding ahi.
(f) Bawngnawia kisiem an nehjouva sa ineh dingle amasaa changlhah them/hal phatea phiet thieng masah a dawkhaang puon (table cloth) jong kheel ding ahi. Sa chun khonunga heh dinga kikoi changlhah chu atohkhah louna dinga veentup lheh angaije. Sa neh masat ahijongleh hiche daan hi jui thou thou ding ahi.
(g) Sa huonna leh nehna a kimangcha thilkeu leh Bawngnawi awmna leh nehna manchah haw akichawhal louna dinga phatea melchih-a a chuom chieh a koi ding ahi. (Manchah kiti chu um-le-beel, kuong/lheeng, khawn, chemcha, thihkhe, folk etc. ahi). Sa-a jong hilou, bawngnawi jong hilou chemcha chuombeh ‘Parve' khat nei aphai.
(h) Sa hal khat bawngnawi awmna beel sung ah lhalut taleh, ahiloule bawngnawi mal khat sa beel sungah valut taleh; beel sung hilou apang ham ahilouleh asin chung hama jong valha taleh Rabbi thiemtah khat doh angaiin ahi.
(i) Bawngnawi chawna thihkhe dap (lum lou) khat sabeel dap sunga ana ki thunlut khah leh twidap—a thihkhe chu sawp thienga phathei jieng ahi. Sa chawna thihkhe bawngnawi bela ana lut kha jong chuti thou chu ahi. Ahi'nla, bawngnawi khe chu adap hihen, alum hijongleh sa beel chu asa (alum) ahia ahileh ahilouleh beel sunga kihuon chu sa hihihjongleh a beel chu sa kihuonna beel ahileh, chuleh bawngnawi beela sa chawna thihkhe kihenglut kha hijongleh Rabbi thiemtah khat doh angaijin ahi,
(j) Sa kihuon asat laiin bawngnawi thila kimang chemcha khat in ana ki-aat kha taleh, ahiloule hiche chemcha chun anche khat ki aat henlang hiche anche chu sa huonna bel ah ana kihuon taleh ipi tiding ham ti Rabbi thiem khat doh angaije. Chemcha leh anche haw chu ana kitongkha talou, adap (asa lou) ahi-a chi saw-al lou ahiloh sawp thienga man kit jieng thei ahi.
(k) Bool khat ah sa kihuon honlang aki huon jou in bel chu ki sawpthieng henlang nikhat sungin hiche bel mama chun bawngnawi ki huon kit taleh beel jong bawngnawi jong abuoh tauve. (Bawngnawi beela sa huon, sa beela bawngnawi huon - thakhat khat ahi) Beel vang chu Hagala daana suh thieng kit thei ahi.
