JUDA INSUNG-MI/INKUO

JUDA INSUNG-MI/INKUO
(The Jewish Family)

1. Juda inkuo khat hinkhuo kingapna bulpi chu thienthouna ahi. Thienthouna kiti chu thil athieng leh abuoh khen thiemna ahi.

2. Pasal khat dinga ajinu tailou numei dang, nungah hijieng jongle, nupa kitimat banga kitimatpi ham tahsa paamlam kitohkhah jieng jong phallou ahi.

3. Juda pasal jousien suon-le-pah anei theina diuva ji anei chieh’u angaije. Cha neisa hita jongle pasal khat chu ji beija aum den ding ahi puoi.

4. Cha-lukim hing (chapa le chanu neita) mi khat chun "sun-le-pah hin nai unlang" ti thupieh chu asubulhing tan ahi.

5.Mi khatin aki chenpitheilou, timat jong akitimat pi theilou mi chu anuoia kipie haw hi ahiove:- Midang ji; ama Nu; anunaw (apa ji thah); a suopinu (a nunaw cha hijongle); ama Chanu; ama tunu; atusawn; ama Ninu; anungah (apangah jinu); amou (achapa jinu); asuopipa jinu; ajinu chanu; ajinu tunu; aji tusawn; ajinu suopinu (aji damsunga); ajinu nu; achapapa mounug achanunu mounu api; api Nu.

6. A chunga kipie numei haw lah’a khat pen pen ham, numei ji neilou ham, ahiloule a dawngmanu ham hijongle munthip khata amani changseh guhthima aum khawm diu phal ahi puoi. Mi khat chu anu apa tovaang hawilai ajong aumkhawm thei uve. Pasal le pasal kitimat jong phallou ahi.

7. Pasal khat le numei khat kitimatna diuva kiphal phaat chu akicheen jou tieng’u le bou ahi. Hiche phat jienga jong chu Juda pasal khat chu ama tahsa nopna (passions) aki thujaw sah ding ahi puoi; ijieh inem itile ama chu sahiem (ganhing) ahi puoi ahi.

8. Nupa hinkhuo adinga khawh le pawimaw peen chu kijatuona le ki ngailutna ahi. Ki panpi tuo ding; ima jousiea deidaan le lunggeel ki dohtuoa ki hetthiem tuo ding ahi.

9. Numei khat angainaa athienlou peet (Nidah ahi pet) a tohkhah pi phal ahi puoi (tahsa pawlam hijieng jongle). Hichechu nupa kahajong phal ahi dieh puoi.

10. Numei chu a thienlou kipatna kuona ni nga (5) jouva simpata ni 7 (sagi) alhin phatle Halakha dungjui kisilna (Mikveh) anei ding, chejou tiengle chun bou ajipa kawma lut thei ding ahi.

11. Thienlouna akuona kisuhthienna Daan (Nidah Laws) atam lheh jiengin, hijieh achu phatechaa jui bulhin thena dinga hiche Daan hawhi gut tah le lunglut tah’a sima heetchil ding aphai. Pasal in pasal kawma asima chule numeiin numei kawma asim ding ahi. Tahsa pienphunga haatmawna anei utoh, chapang olna a kin khawh tamtah anei utoh ahile numei chu bawlding-thupieh (positive commandments) atamjaw akuonin aki awndoh sah un ahi. Ahi'nla chutia kingehlou thupieh haw tailou thupieh dang vaang, abawl’u angai thouve.

13. Phaattum neija bawl ding Thupieh phabep aumin, chehaw vaang chu numei hawn jong abawl tei ding dawlu ahi. {Hitobang thupieh haw chu itobang ham ti chu awlsei tao hite}

14. Mi-pa khat chun achate hil ngai jousie ahil ding dawl ahi'n, chena achu minu ten hataha aki thuopi diu angaije. Chapang vaang chu Oja (teacher) khatin jong ahil thei ahi nai. Ko'n hil tajongle minu-mipa ten umchan pha le hawi chu insunga achateu amusah diuva kilawm ahi.

15. Pasal chapang kum 13 alhin masang chule Numei chapang kum 12 alhin masanga thupieh ajui phat le jui phatlou chu apa mawpuohna ahi. Hiche kum haw hi ahin khel phaat ule vaang mi-pilhing a gel ahi tauve; hijieng jongle anu lehpa thu angai nahlai uva ahile anu le pa’n lamdih a apui jing uh aphai.

16. Nu-le-Pa jabawl ding tihi thupieh laha akhawh pen lawi khat ahi; ajiehchu akhang khanga hung kipie sawn ding pu-chawn pachawn Daan jousie hiche thupieh akuona a hung kipan doh ahiuve.

17. Nu le Pa chu iti kijabawla ham ? Nih le puon chule neh le chah suhtuo pieh ding, chule aihaangpi a angaichaat jousieu hawlkhawm pieh ding ahi. Khut-daw louva na bawl angai jongle na bawl tei ding ahi.

18. Achunga kiseisa toh kilhonin nu le pa jabawlna chu hitia vetsah ding ahi:- na umna muna ahung lut ule na dindoh ding, ama haw touna (touna chuom nei ahiuleh) a na tou lou ding; ha nielkal lou ding, itinama jongle amin uva na kou lou ding, ahin phaw nau le tamnau jong thipbcha na thuoh ding, itinama jongle na jumsuo theilou ding ahi.

19. Nu le pa'n jong acha teu chu avum-avaala puohgih a puoh sah lou diu ahi. Puohgih akuona lunghaan hung uma, hiche chun chapang chu lamdih akuona apotmang sah thei ahi.

20. Mi jousie'n a uteu; anunaw-apa naw chule api apu teu jong ajabawl suoh kei diu ahi.